Si e ktheu Fehmi Fetahi një ëndërr në destinacion turistik të Kosovës?

DEÇAN — Në një kohë kur turizmi në Kosovë po zhvillohet me ritme të shpejta, Vali Ranch shënon 20 vjet nga themelimi i tij. Nga një ide e lindur në diasporë, kompleksi është shndërruar në një nga destinacionet më të njohura turistike dhe hoteliere të vendit.

Fehmi Fetahi, themeluesi i Vali Ranch, kujton fillimet me pasiguri, por edhe me besim të fortë. "Kishim një ëndërr të madhe, por nuk kishim luksin të gabonim. Çdo investim ishte fryt i punës sonë shumëvjeçare në Zvicër," thotë ai. Ideja fillestare ishte të krijonin një vend ku familjet të ndiheshin mirë, me natyrën dhe mikpritjen në qendër.

Suksesi i Vali Ranch nuk erdhi nga synimi për t’u bërë "më i madhi", por nga përkushtimi ndaj çdo mysafiri. "Kur njerëzit kthehen përsëri dhe na rekomandojnë te miqtë e tyre, e kupton se je në rrugën e duhur," shpjegon Fetahi. Emri i kompleksit u ndërtua gradualisht, pa reklama, por me përvojë cilësore.

Gjatë dy dekadave, Vali Ranch ka ndryshuar dukshëm. Nga kapacitete të vogla, sot kompleksi përfshin objekte si Park Hotel, Royal Hill Palace, Quin Vali Palace, Sun Garden, restorantet Romantika, Daris, Steak House, si dhe hapësira për dasma, konferenca dhe aktivitete familjare. "Synimi ynë ka qenë që çdo vizitor të gjejë një përvojë të plotë," thekson Fetahi.

Diaspora shqiptare luan një rol të rëndësishëm në suksesin e Vali Ranch. "Shumë bashkatdhetarë vijnë çdo verë dhe duan të kalojnë kohë cilësore me familjet e tyre. Ne mundohemi t’u ofrojmë një vend ku ndihen si në shtëpi," thotë ai. Besimi i diasporës është përgjegjësi e madhe për ekipin e kompleksit.

Familja ka qenë kyçi i këtij suksesi. "Një biznes familjar nuk ndërtohet nga një njeri i vetëm. Secili ka dhënë kontributin e vet," shpjegon Fetahi. Për të, suksesi më i madh nuk është vetëm biznesi, por kujtimet që kanë krijuar për vizitorët. "Shumë çifte e kanë festuar dasmën e tyre këtu para 15-20 vjetësh, dhe sot kthehen sërish me fëmijët e tyre," thotë ai me krenari.

Për të ardhmen, Fetahi synon të zgjerojë ofertën e Vali Ranch me hapësira të reja rekreative. "Investimi nuk përfundon kurrë," thekson ai. Këshilla për të rinjtë që duan të ndërtojnë biznes? "Të mos kërkojnë sukses të shpejtë. Të punojnë me ndershmëri dhe të mos dorëzohen pas pengesës së parë."

Burim: Albinfo.ch
— Redaksia ZHURMA