Çfarë tregon sondazhi i SRG-së për nismën e SVP-së në Zvicër?
Sondazhi i ri i SRG-së tregon 52% kundër iniciativës për t'i kufizuar banorët në 10 milionë deri më 2050.
CYRIH — Më pak se dy javë para referendumit të 14 qershorit, kundërshtarët e iniciativës së Partisë Popullore Zvicerane (SVP) për kufizimin e popullsisë në 10 milionë banorë deri më 2050 kanë marrë epërsinë. Sipas sondazhit të dytë të transmetuesit publik SRG, 52 për qind e votuesve pritet të votojnë kundër, ndërsa 45 për qind janë pro dhe 3 për qind të pavendosur.
Iniciativa "Kundër një Zvicre me 10 milionë banorë" do të nënkuptonte kufizimin drastik të ardhjes së të huajve. Në fillim të majit kampet pro dhe kundër ishin të barabarta, por kundërshtimi u thellua. Te zviceranët e diasporës, 63 për qind do të votonin kundër — 11 pikë më shumë se brenda vendit.
Politologu Lukas Golder nga gfs.bern vëren se zviceranët jashtë shtetit përfitojnë drejtpërdrejt nga marrëveshja për lëvizjen e lirë me BE-në, të cilën SVP-ja kërkon ta shfuqizojë. Ai shton se diaspora zvicerane ka rrëzuar të gjitha iniciativat e ngjashme në të kaluarën, përfshirë atë kundër imigracionit masiv të vitit 2014.
Burim: Telegrafi
— Redaksia ZHURMA