Gjonaj kërkon dorëheqjen e Ramës mes skandaleve për donacione nga mafia

Ish-këshilltari i bashkisë së Nju Jorkut, Mark Gjonaj, kërkoi dorëheqjen e kryeministrit Edi Rama përmes një deklarate publike në rrjetet sociale. Ai përballet me kritika për shkak të hetimeve të mëparshme federale në SHBA lidhur me pranimi e mijëra dollarëve donacione nga anëtarë të dyshuar të familjes mafioze Gambino dhe zhvillues pronash.

Më parë, Gjonaj ka shërbyer si anëtar i Parlamentit të Shtetit të Nju Jorkut nga radhët e Partisë Demokratike Amerikane. Ai gjithashtu mbante marrëdhënie të afërta me kryeministrin Edi Rama, qeveria e të cilit e pati emëruar për një periudhë si drejtues të diasporës shqiptare në SHBA. Së fundmi, deklarata e tij e shpërndarë në media opozitare nxori në pah historikun e problemeve të tij me drejtësinë amerikane.

Sipas një shkrimi të publikuar më 10 mars 2020 nga gazeta Cityandstateny me autore Amanda Luz dhe Henning Santiago, autoritetet federale hetuan lidhjet e politikanit me krimin e organizuar. Në dhjetor të vitit 2019 u zbulua se Gjonaj kishte marrë financime fushate nga Mark "Chippy" Kocaj dhe John "Smiley" Simonlacaj, dy individë të akuzuar nga drejtësia amerikane si pjesë e familjes Gambino. Pas këtij publikimi, kryetari i Këshillit Bashkiak Corey Johnson kërkoi kthimin e menjëhershëm të këtyre parave të pranuara nga krimi i organizuar.

Përveç kësaj, aktivistët e komunitetit në Bronx kundërshtuan një projekt për ndërtimin e një kompleksi banesor, pasi doli se Gjonaj kishte pranuar një donacion prej 11,000 dollarësh nga persona të lidhur me pronarët e kompanisë zhvilluese Exact Capital në shtator 2019. Po ashtu, presidenti i bashkisë së Bronx-it, Ruben Diaz Jr., kishte marrë 15,000 dollarë donacione nga bashkëpronari i kësaj firme në vitet 2014 dhe 2016. Projekti u mbështet prej tyre dhe u miratua në vitin 2018 nga Këshilli Bashkiak, pavarësisht oponencës nga dy borde komunitare.

Hetimet zbuluan gjithashtu se në dhjetor të vitit 2018, Gjonaj shpërndau mbi 20,000 dollarë nga buxheti zyrtar i Këshillit Bashkiak për biznese me lidhje te donatorët e tij. Kompania e ndërtimit Pro Design & Construction Corp. rezulonte me të njëjtën adresë si firmat e përfshira në këto transaksione.

Sa i përket përplasjeve për projektin ndërtimor në Bronx, Gjonaj deklaroi për median lokale NY1 se ai nuk kishte qenë mbështetës fillestar i tij, por e kishte transformuar projektin për t'i sjellë dobi komunitetit dhe zonës përreth. Nga ana tjetër, zyrtari Ruben Diaz Jr. nuk iu përgjigj kërkesave të medias për të komentuar akuzat. Gjithashtu kryetari i atëhershëm i Këshillit Bashkiak, Corey Johnson, pati deklaruar publikisht se askush nuk duhet të pranojë para nga familja kriminale Gambino dhe se kjo shumë duhej kthyer pas.