Shuhen zjarret në Dajt e Berat — mbetet aktive vetëm vatra në Memaliaj
Agjencia e Mbrojtjes Civile njoftoi se flakët në Klos, Kavajë e Mallakastër janë vënë nën kontroll dhe nuk rrezikojnë më banesat.
TIRANË — Situata e zjarreve në Shqipëri është përmirësuar duke sjellë shuarjen e vatrave në Dajt e Berat, ndërsa vatra e vetme që mbetet ende aktive ndodhet në Alikomemaj të Memaliajt. Sipas Agjencisë së Mbrojtjes Civile, ndërhyrja e forcave zjarrfikëse dhe efektivëve të Forcave të Armatosura ka shuar plotësisht edhe vatrat në Priskë dhe Uruç të Peqinit.
Ndërkohë, flakët janë vënë nën kontroll në Çikallesh të Kavajës, në Mallakastër dhe në fshatin Plan të Bardhë në Klos. Në këtë të fundit, ku zjarri kishte krijuar rrezik për disa banesa më herët, ndërhyrja e forcave në terren ka bërë të mundur izolimin e situatës.
Në Memaliaj vijon ndërhyrja e ekipeve zjarrfikëse që po punojnë për shuarjen e plotë të flakëve dhe neutralizimin e rrezikut. Agjencia e Mbrojtjes Civile ka bërë të ditur se të gjitha zonat ku zjarret janë izoluar do të vazhdojnë të monitorohen me vëmendje për shkak të mundësisë së riaktivizimit të tyre.
Burim: Ora News
— Redaksia ZHURMA
