Haziri: Fotografinë e Titos ua larguam nga shtëpitë por jo nga mendjet

Nënkryetari i Lidhjes Demokratike të Kosovës, Lutfi Haziri, ka përmendur rrugëtimin historik të vendit, rolin e udhëheqësve dhe sakrificat e bëra për liri gjatë një reagimi të bërë në rrjetin social Facebook. Ai është fokusuar te përpjekjet e hershme të popullit për t’u shkëputur përfundimisht nga e kaluara totalitare dhe simbolet e saj.

Sipas Hazirit, pavarësisht se gjurmët fizike të regjimit të vjetër u hoqën nga ambientet, institucionet, dhomat e shtëpive dhe librat, nostalgjia tek disa individë vazhdon të mbetet një sfidë e kujtesës kolektive. «Edhe foton e Titos ua larguam nga dhomat e shtëpive, emrin e shkruar ua larguam nga librat dhe mendjet e tyre, por nostalgjinë për të, si duket, jo», ka shprehur ai, duke shtuar se populli mban mend gjatë dhe se ndërtimi i së ardhmes kërkoi një shkëputje të thellë nga e kaluara.