Shtyrja 60-ditore e verdiktit në Hagë

HAGË — Gjyqtarët e Dhomave të Specializuara kanë kërkuar afat shtesë 60-ditor për vendimin në rastin kundër krerëve të UÇK-së. Vendimi, i cili ishte planifikuar të jepej më së largu deri më 20 korrik, tani do të shtyhet me 60 ditë të tjera, nëse nuk ka ndonjë kërkesë tjetër për shtyrje.

Sipas dokumentit të Dhomave të Specializuara, gjyqtarët e arsyetuan këtë shtyrje me volumin e jashtëzakonshëm dhe kompleksitetin e materialeve të çështjes. Paneli mori dëshminë e afërsisht 270 dëshmitarëve, me gojë dhe me shkrim, dhe pranoi 5.497 prova materiale, ndërsa transkripti i procedurave arrin në 29.238 faqe.

Gjyqtarët theksuan se synojnë të sigurojnë një vlerësim të plotë dhe të drejtë të të dhënave provuese, si dhe një mendim të arsyetuar siç duhet për këtë rast. "Paneli konstaton se rrethanat e çështjes kërkojnë kohë shtesë, përkatësisht 60 ditë, për shpalljen e Aktgjykimit," thuhet në vendim.

Megjithatë, gjyqtarët pranuan se të akuzuarit kanë të drejtë të gjykohen brenda një kohe të arsyeshme dhe se janë të vetëdijshëm sa kohë kanë kaluar tashmë në paraburgim. "Zgjatja justifikohet nga nevoja për të siguruar një vlerësim të drejtë, gjithëpërfshirës dhe të arsyetuar," thuhet në vendim.

Gjyqtarët kanë theksuar se mund të kërkojnë edhe një afat shtesë, nëse kjo bëhet absolutisht e nevojshme. Në Kosovë, kjo shtyrje është interpretuar si vendim politik, për shkak të zgjedhjeve.

Burim: Nacionale
— Redaksia ZHURMA