Kush u kritikua pas humbjes së Argjentinës?

— Humbja e Argjentinës në finalen e Kupës së Botës ndaj Spanjës ka sjellë kritika për trajnerin Lionel Scaloni, veçanërisht për zgjedhjet taktike dhe vendimin për të mos aktivizuar Lautaro Martinez. Sipas analizës së mediave italiane, Spanja dominoi ndeshjen në çdo aspekt, duke ia hequr Argjentinës kontrollin e topit dhe duke e penguar të ndërtonte aksione sulmuese.

Kampionët e botës në fuqi nuk regjistruan asnjë goditje në kuadrat gjatë 120 minutave, ndërsa vetëm në minutat e fundit të kohës shtesë arritën të afrohen me rrezik pranë portës së Unai Simon. Megjithëse cilësia e skuadrës së Luis de la Fuente vlerësohet si faktori kryesor i triumfit, analiza thekson se edhe qasja tepër mbrojtëse e Argjentinës ndikoi në rezultatin final.

Sipas saj, skuadra e Scalonit u mbështet pothuajse tërësisht te frymëzimi individual i Lionel Messit, pa arritur të ndërtojë lojë kolektive apo të shfrytëzojë krahët. Një nga vendimet më të kritikuara ishte mosaktivizimi i Lautaro Martinez. Sulmuesi i Interit, autor i golave vendimtarë ndaj Zvicrës, Anglisë dhe Jordanisë gjatë turneut, e ndoqi të gjithë finalen nga stoli.

Edhe pas kartonit të kuq të Enzo Fernandez dhe ndryshimeve të detyruara, Scaloni zgjodhi të forconte mbrojtjen me Marcos Senesi në vend që të hidhte në fushë Lautaron, duke i lënë Spanjës më shumë hapësira për t’u përqendruar te Messi. Pas ndeshjes, Lautaro reagoi në rrjetet sociale, duke shprehur krenarinë për rrugëtimin e Argjentinës, por edhe keqardhjen që nuk pati mundësi të ndihmonte skuadrën në fushë.

“U përpoqëm. Për të dytin Botëror radhazi arritëm në finale, por këtë herë nuk shkoi siç shpresonim. Jam jashtëzakonisht krenar që jam argjentinas. Do të kisha dashur ta ndihmoja ekipin edhe në fushë, por kështu erdhën gjërat. Faleminderit të gjithë atyre që na mbështetën gjatë gjithë këtij Botërori”, shkroi sulmuesi i Interit.

— Burim: Top Channel, https://top-channel.tv/2026/07/20/scaloni-nen-akuze-hidherimi-i-el-toro-120-minuta-ne-stol-dhe-lot-lautaro-doja-ta-ndihmoja-ekipin/

— Redaksia ZHURMA