Sali: Afrimi me BE-në duhet t’i sjellë qytetarëve përfitime të prekshme

Gjatë një vizite pune në kryeqytetin gjerman, Zëvendëskryetari i Parë i Qeverisë dhe Ministër për Çështje Evropiane, Bekim Sali, u takua me deputetin e Bundestagut gjerman, Peter Beyer. Gjatë këtij takimi u bisedua rreth perspektivës evropiane të Maqedonisë së Veriut, zhvillimeve aktuale në politikën e zgjerimit të Bashkimit Evropian, si dhe mundësive për të forcuar bashkëpunimin dypalësh. Temë kryesore e bisedimeve ishte integrimi gradual në tregun e përbashkët evropian.

Sali theksoi rëndësinë e qasjes së re të Komisionit Evropian për një Bashkim Evropian më të gjerë, duke kërkuar që procesi i zgjerimit të jetë më i shpejtë, i parashikueshëm dhe i mbështetur te meritat. Sipas tij, qytetarët dhe bizneset duhet t’i përjetojnë përfitimet e lidhjes më të ngushtë me bllokun evropian që tani, ndërkohë që vendi vazhdon punën për reformat e nevojshme drejt anëtarësimit të plotë.