Shtetet kërcënojnë me bojkot për shkak të rikthimit të Rusisë në hokej

Gjykata e Arbitrazhit Sportiv (CAS) vendosi më 30 tetor se Federata Ndërkombëtare e Hokejit mbi Akull (IIHF) duhet t'i rikthejë ekipet ruse në garat ndërkombëtare. Mirëpo, një numër në rritje shtetesh kanë paralajmëruar bojkotim të ndeshjeve kundër ekipeve të Moskës, duke vënë në rrezik zhvillimin e Kampionatit Botëror të vitit të ardhshëm.

Federata Ndërkombëtare e Hokejit mbi Akull e kishte përjashtuar Rusinë që nga nisja e pushtimit ushtarak në shkallë të plotë të Ukrainës në vitin 2022. Pas vendimit të CAS-it, IIHF-ja deklaroi se nuk është dakord me këtë përfundim, megjithatë do ta zbatojë atë. Rikthimi i ruseve është paraparë të nisë nga Kampionati Botëror për të Rinj që do të mbahet pas më pak se dy muajsh në Kanada. Ky do të përbënte turneun e parë madhor ku merr pjesë Rusia që prej Lojërave Olimpike të Pekinit të mbajtura në vitin 2022.

Vendimi nxiti reagime negative nga Ukraina, e cila deklaroi se me këtë akt po njolloset akulli me gjak ukrainas. Gjithashtu, autoritetet në Kiev bënë të ditur se qindra sportistë ukrainas janë vrarë gjatë luftës dhe qindra objekte sportive janë shkatërruar ose dëmtuar nga bombardimet ruse. Të paktën gjashtë vende evropiane, si Suedia, Republika Çeke, Norvegjia, Danimarka, Letonia dhe Finlanda, kanë njoftuar refuzimin për të luajtur kundër përfaqësueseve ruse. Po ashtu, disa prej sponsorëve të turneut si AJ Products, STRAUSS dhe Skoda Auto kanë deklaruar rishqyrtimin e mbështetjes së tyre financiare nëse sportistët rusë marrin pjesë.

Pritet që diskutimet rreth pjesëmarrjes të vazhdojnë përpara nisjes së Kampionatit Botëror për të Rinj në Kanada. Në anën tjetër, Federata Gjermane e Hokejit po analizon hapat e ardhshëm lidhur me Kampionatin Botëror të majit 2027 që pritet të organizojë.

Kryeministri kanadez Mark Carney deklaroi më 3 nëntor: «Rusia dhe Bjellorusia po e mbështesin këtë luftë të paligjshme, të pajustifikuar dhe të tmerrshme në Ukrainë. Për sa kohë që kjo luftë vazhdon, asnjë nga këta sportistë nuk do të garojë për vendet e tyre në Kanada».

Kryetari i Federatës Gjermane të Hokejit mbi Akull, Frank Lutz, u shpreh: «Lejimi i pjesëmarrjes së Rusisë do të kishte pasoja serioze për ne si vend mikpritës sa i përket sigurisë, por edhe në aspektin politik dhe ekonomik. Qëndrimi ynë mbetet i pandryshuar: ne e kundërshtojmë rikthimin e ekipeve ruse në turnetë ndërkombëtarë të hokejit mbi akull».

Ministri i jashtëm ukrainas Andriy Sybiha shkroi më 4 nëntor se «Rusia do të ndëshkohet në akull», duke shtuar se «Moska ende beson se mund t’i fshehë krimet e saj pas një fanelle të hokejit dhe se një pistë patinazhi mund t’ia rregullojë reputacionin e dëmtuar».

Nga ana tjetër, ministri i Sportit i Rusisë, Mikhail Degtyarev, i minimizoi reagimet duke deklaruar se bota është shumë më e madhe se Skandinavia apo shtetet baltike.