Sa persona u prekën nga zjarri i deponisë në Sferkë?
Prokuroria ka kërkuar shtimin e ekipeve të zjarrfikësve dhe ka autorizuar një ekspert për të përcaktuar shkaqet e zjarrit.
Redaksia ZHURMA · · Përditësuar · 1 min lexim
SFERKË — Një person u dërgua për trajtim mjekësor në Spitalin Rajonal të Pejës, ndërsa disa të tjerë morën ndihmë mjekësore në vendngjarje, si pasojë e situatës së krijuar nga zjarri në deponinë e mbeturinave në Sferkë, ku më herët disa protestues ishin helmuar gjatë një proteste. Për menaxhimin e situatës u angazhuan Policia e Kosovës, ekipet emergjente dhe zjarrfikësit.
Prokurori i Shtetit ka kërkuar shtimin e masave dhe angazhimin e ekipeve shtesë të zjarrfikësve, me qëllim lokalizimin sa më të shpejtë të zjarrit. Prokuroria ka bërë të ditur se menjëherë pas shpërthimit të zjarrit në këtë deponi javën e kaluar ka autorizuar edhe një ekspert të zjarreve për të përcaktuar shkaqet e tij.
Eksperti pritet të dorëzojë raportin me të gjeturat në Prokurori. Nëse konstatohet se zjarri është shkaktuar nga faktori njerëzor, Prokuroria thotë se do të ndërmarrë të gjitha veprimet e nevojshme ligjore për identifikimin dhe arrestimin e personit ose personave përgjegjës.
Burim: Demokracia
— Redaksia ZHURMA
