Spajiç: Dyshime për ndikim të Beogradit dhe kërkesë për hetim parlamentar

Kryeministri i Malit të Zi, Milojko Spajiç, ka ngritur dyshime për ndikim politik të Beogradit përmes mediave malazeze, dy muaj pasi paralajmëroi një operacion të koordinuar nga jashtë, ndërsa partia e tij Lëvizja Europa Tani i ka kërkuar parlamentit të hetojë marrëdhëniet e televizioneve me mbulim kombëtar me kompanitë serbe M-tel dhe grupin financiar Alta.

Këto zhvillime pasojnë paralajmërimin e bërë më 27 gusht nga Spajiç, i cili deklaroi se shërbimet e sigurisë kishin informacione për një operacion të mundshëm destabilizimi dhe pengimi të anëtarësimit në Bashkimin Europian, ku sipas gazetës malazeze «Vijesti» përfshihej edhe Shqipëria, gjë që nxiti kryeministrin Edi Rama të kërkonte sqarime nga Podgorica, e cila i komunikoi se Shqipëria nuk ishte pjesë e vendeve të referuara.

Partia e kryeministrit Spajiç kërkon që institucionet të zbulojnë marrëdhëniet financiare dhe tregtare mes televizioneve dhe kompanive M-tel, Alta Bank e Alta Pay Group, ndërsa sipas të dhënave të publikuara M-tel operon në Mal të Zi prej vitit 2007 dhe zotërohet nga Telekom Srbija ku shteti serb ka 58.11 për qind të aksioneve, kurse biznesmenit serb Davor Macura i u ndalua hyrja në aeroportin e Podgoricës më 14 tetor, kurse Banka Kombëtare e Serbisë i hoqi licencën Alta Bank më 30 tetor për shkak të gjendjes financiare. Për këtë situatë, Banka Qendrore e Malit të Zi sqaroi se Alta Bank nuk ka licencë për të ushtruar aktivitet bankar në vend dhe masa serbe nuk e rrezikon sistemin financiar malazez, ndërsa Alta Pay Group mbetet e licencuar për transfertash parash që nga janari i vitit 2024, sipas njoftimeve zyrtare.

Institucionet dhe parlamenti malazez pritet të shqyrtojnë kërkesat për zbardhjen e ndikimeve të mundshme të jashtme dhe verifikimin e aktiviteteve të kompanive të përfshira në tregun e vendit.

Në lidhje me këto zhvillime, kryeministri malazez shkroi në rrjetin X se «zhvillimet aktuale në vend dhe në rajon konfirmojnë seriozitetin dhe cilësinë e informacioneve që kanë shërbimet tona dhe ato partnere të sigurisë, për të cilat paralajmërova në fund të gushtit».