Petrushevski: LSDM dhe BDI po mbrohen nga përgjegjësia në gjyqësor

TETOVË — Brane Petrushevski deklaroi në një konferencë për media se opozita po përpiqet të shmangë përgjegjësinë për tragjedinë e spitalit modular nëpërmjet ndikimeve të saj në sistemin gjyqësor. Kjo deklaratë vjen pas vendimit të gjyqtarit Afrim Fidani për të liruar nga akuzat ish-drejtorët e Spitalit të Tetovës, Artan Etemi dhe Florin Besimi, në rastin ku humbën jetën 14 persona.

Tragjedia në spitalin modular të Tetovës ndodhi më 8 shtator 2021, kur u përfshi nga flakët objekti ku trajtoheshin pacientët me Kovid-19, duke marrë jetën e 14 pacientëve dhe anëtarëve të familjeve që ndodheshin brenda. Shkaku i zjarrit iu atribua një kablloje të djegur, ndërsa 14 persona të tjerë arritën të shpëtoheshin përpara se objekti të digjej plotësisht. Për shkak të mosmarrjes së drejtësisë për këtë ngjarje, familjarët dhe qytetarët organizuan disa protesta ndër vite për të kërkuar zbardhjen e shkaqeve.

Sekretari i përgjithshëm i VMRO-DPMNE-së dhe deputeti, Brane Petrushevski, theksoi se ky është një tjetër rast ku gjyqësori vepron në mbrojtje të ish-funksionarëve të LSDM-së dhe BDI-së. Ai bëri krahasim me hetimet, duke vënë në dukje se prokurori Islam Abazi më parë nuk kishte hapur lëndë ndaj ish-ministrit të Shëndetësisë, Venko Filipçe. Sipas tij, Filipçe dhe lideri i BDI-së, Ali Ahmeti, përpiqen të mbrohen nga përgjegjësia përmes njerëzve të tyre në drejtësi, ndërsa pyeti pse ish-ministri nuk është thirrur as për të dhënë deklaratë informative.

Partia politike VMRO-DPMNE, përmes përfaqësuesit të saj, kundërshtoi gjithashtu kufizimin e përgjegjësisë vetëm te kablloja e dëmtuar, duke kërkuar që të përcaktohet përgjegjësia e plotë për ngjarjen. Petrushevski shtoi se rasti ku u dogjën 14 bashkëqytetarë kërkon një epilog tjetër gjyqësor.

«Vetëm para pak muajsh, Islam Abazi e amnistoi Filipçen nga çdo përgjegjësi në rastin e spitaleve modulare, duke mos hapur lëndë për këtë rast. Sot, Afrim Fidani i liroi Artan Etemin dhe Florin Besimin, ish-drejtorët e spitalit të Tetovës, lidhur me zjarrin ku humbën jetën 14 bashkëqytetarë tanë», deklaroi Petrushevski gjatë konferencës për media. Ai gjithashtu ngriti pyetjen se si është e mundur që për një ngjarje të tillë të mos ketë persona të akuzuar apo të dënuar. «A fshihen aktgjykimet dhe akuzat në sistemin gjyqësor nëse je i afërt me Filipçen apo Ahmetin? Rasti në të cilin u dogjën të gjallë 14 bashkëqytetarë tanë duhet të ketë një epilog tjetër gjyqësor. Drejtësi duhet të ketë», u shpreh ai.