Si e gëlltit qiraja 721-euro pagën e tiranasit?

TIRANË — Qiraja mesatare e apartamenteve në Tiranë ka arritur 721 euro në muaj për vitin 2026, sipas të dhënave të agjencive imobiliare. Niveli tejkalon ndjeshëm kufirin ndërkombëtar të përballueshmërisë, i cili rekomandon që kostoja e strehimit të mos kalojë 30% të të ardhurave mujore të familjes ose individit.

Paga mesatare mujore bruto në Shqipëri arriti 90,119 lekë — rreth 930 euro — sipas INSTAT për tremujorin e parë të 2026. Me këtë bazë, një individ mesatar do të shpenzonte 77% të ardhurave bruto vetëm për qira, sipas llogaritjeve të koeficientit ndërkombëtar të përballueshmërisë.

Situata bëhet akoma më e vështirë kur llogaritet me pagën neto: rreth 72,000 lekë — ose 740 euro. Në këtë rast, qiraja mesatare zë rreth 97% të të ardhurave mujore, duke e kthyer strehimin individual në kryeqytet në një barrë praktikisht të pamundur për t'u mbajtur.

Edhe familjet nuk janë imune. Një familje me tre anëtarë — dy të rritur dhe një fëmijë — me të ardhura bruto mesatare prej rreth 182,200 lekësh shpenzon rreth 39% të buxhetit për qira; me të ardhura neto, kjo shifër ngjitet në rreth 49%, shumë mbi pragun ndërkombëtar prej 30%.

Stresit të strehimit i shtohet barra e ushqimit. Në Shqipëri, shpenzimet për ushqime zënë rreth 40% të buxhetit familjar mujor, krahasuar me mesataren e BE-së prej rreth 13%. Sipas INSTAT, familjet shpenzuan mesatarisht 93,000 lekë në muaj për konsum në 2024, me grupin “ushqime dhe pije jo-alkoolike” duke zënë 39.6% të shpenzimeve.

Çmimet ndryshojnë sipas lagjes. Pranë stadiumit “Dinamo”, apartamentet 1+1 variojnë nga 500 deri 1,000 euro — me rritje maksimale deri 25% krahasuar me vitin e kaluar. Në zonën e Liqenit, çmimet kanë arritur deri 1,500 euro në muaj, nga 1,300 euro në 2025, rritje prej 15%.

Agjentët imobiliarë tregojnë se rritja e çmimeve lidhet edhe me pesëfishimin e njësive Airbnb në Tiranë: nga rreth 1,000 listingje në 2021 në rreth 5,200 në 2025, sipas AirDNA. Ky fenomen pakëson ofertën për qira afatgjata dhe pritet të ushtrojë presion të vazhdueshëm mbi tregun edhe në 2026.

Burim: Almakos
— Redaksia ZHURMA