Qindra shqiptarë me flamuj në Hagë një ditë para aktgjykimit për ish-krerët e UÇK-së

Një ditë para shpalljes së aktgjykimit të shkallës së parë për ish-krerët e Ushtrisë Çlirimtare të Kosovës, qindra shqiptarë janë mbledhur para objektit të Dhomave të Specializuara në Hagë. Ata mbanin flamuj të UÇK-së, të Kosovës dhe të Shqipërisë, duke shprehur mbështetje për Hashim Thaçin, Kadri Veselin, Jakup Krasniqin dhe Rexhep Selimin.

Vendimi pritet të shpallet më 16 shtator në orën 10:00. Qytetarë nga Kosova dhe vende të ndryshme të Evropës kanë udhëtuar drejt Hagës për të ndjekur ditën e verdiktit. Forca të shumta policie janë të pranishme në zonë.

Kjo atmosferë vjen pas një procesi të gjatë gjyqësor ndaj katër ish-krerëve të UÇK-së, të cilët po përballen me akuzat në Dhomat e Specializuara të Kosovës.