Policia regjistron disa raste të dhunës në familje në disa qytete

Policia e Kosovës ka njoftuar për disa raste të dhunës në familje të shënuara në rajone të ndryshme, përfshirë Prishtinën, Obiliqin, Pejën, Klinën, Malishevën dhe Gjakovën. Në kryeqytet, një person është arrestuar pasi dyshohet për dhunë fizike ndaj bashkëjetueses së tij, ndërsa gjatë kontrollit i është sekuestruar një pistoletë me shtatë fishekë. Po ashtu në Prishtinë është arrestuar një tjetër i dyshuar për dhunë të vazhdueshme ndaj motrës së tij të mitur, e cila është dërguar në strehimore në prani të zyrtarit për punë sociale, kurse i dyshuari është liruar në procedurë të rregullt.

Në Obiliq është arrestuar një person pas sulmit fizik ndaj babait të tij, i cili ka kërkuar trajtim mjekësor. Ndërkaq, në Klinë është ndaluar një burrë nën dyshimet se ka ushtruar dhunë ndaj bashkëshortes, kurse në Malishevë është vënë në pranga një person për dhunë të ushtruar ndaj prindërve të tij. Në Gjakovë është arrestuar një person me probleme mendore pasi dyshohet se ka keqtrajtuar vëllain e tij, i cili ka pranuar tretman mjekësor. Raste të tjera të dhunës psikike apo fizike, përfshirë ato mes prindërve dhe fëmijëve apo bashkëshortëve, janë raportuar në Pejë dhe Prishtinë, ku disa prej të dyshuarve janë dërguar në mbajtje kurse të tjerë janë liruar në procedurë të rregullt apo janë në kërkim nga autoritetet.