Padia e studentëve kundër Ministrisë për shujtën

Forumi për Ndryshime në Arsim ka ndërmarrë hapa ligjorë duke paditur Ministrinë e Arsimit dhe Shkencës në Gjykatën Administrative. Kryetari i këtij forumi, Blendi Hodai, deklaroi se mospritja dhe mosrritja e shujtës studentore nuk varet nga vullneti i Qeverisë apo ministrisë, por përbën detyrim ligjor. Sipas tij, neni 2 pika 1 e ligjit përcakton qartë se shujta duhet të harmonizohet çdo vit me përqindjen e inflacionit vjetor të shtetit.

Hodai theksoi se «Ministria e Arsimit dhe Shkencës në rastin tonë ka shkelur ligjin dhe ka dëmtuar rreth 3 000 studentë që janë përfitues të shujtës studentore» dhe shtoi se kjo sjell një humbje prej 25 denarësh në ditë për ushqim, që llogaritet në rreth 650 denarë në muaj apo rreth 6000 denarë për një vit akademik prej 9 muajsh. Për më tepër, organizata kërkon që dëmi financiar t'u paguhet studentëve në mënyrë retroaktive, duke kujtuar se 38% e të rinjve në vend ballafaqohen me varfërinë.

Lidhur me ndryshimin e modelit, Hodai shprehu kundërshtimin ndaj propozimit për kalimin përmes m-shërbimeve, duke arsyetuar se procedurat e tenderimit dhe krijimi i platformës do të merrnin 7 deri në 8 muaj kohë, gjë që do të bënte që studentët ta mbyllnin vitin akademik me shumat e deritanishme.