Prokuroria heton nënën në Pejë — dyshohet se goditi vajzën me shufër metalike
E dyshuara 33-vjeçare u intervistua në praninë e neuropsikiatrit dhe u lirua, ndërsa vajza u kthye në banesë pas trajtimit në spital.
PEJË — Një 33-vjeçare me inicialet E. F. po hetohet nga Prokuroria e Shtetit në Pejë nën dyshimin se ka ushtruar dhunë fizike ndaj vajzës së saj 12-vjeçare. Ngjarja ka ndodhur në rrugën "Plavës" të këtij qyteti, ku policia ndërhyri pas raportimit për incidentin dhe gjeti të miturën me shenja të dhunës fizike.
Viktima e mitur fillimisht është dërguar për trajtim mjekësor në Emergjencën e Spitalit të Përgjithshëm në Pejë. Gjatë intervistimit nga hetuesit policorë, ajo ka deklaruar se nëna e saj e kishte goditur dy herë në këmbë me një shufër metalike, duke i shkaktuar lëndime të dukshme trupore.
E dyshuara është marrë në pyetje në praninë e një neuropsikiatri, i cili vlerësoi se ajo ishte e aftë mentalisht për t'iu përgjigjur procedurës hetimore. Prokurori ka iniciuar rastin për veprën penale të dhunës në familje, ndërsa e dyshuara është liruar dhe vajza është kthyer në shtëpi me dëshirën e saj.
Burim: Sinjali
— Redaksia ZHURMA