Sa do të jetë mosha mesatare e popullsisë së Kosovës në 2060?

PRISHTINË — Agjencia e Statistikave të Kosovës (ASK) ka publikuar për herë të parë raportin mbi projeksionet e popullsisë deri në vitin 2060, duke parashikuar një plakje të theksuar të popullsisë. Sipas të dhënave, mosha mesatare e popullsisë së Kosovës do të arrijë 49 vjeç deri në atë vit, një rritje dramatike nga niveli aktual.

Raporti, i bazuar në regjistrimin e popullsisë të vitit 2024 dhe statistikat e lindjeve, vdekjeve dhe migracionit, ofron tre skenarë të zhvillimit demografik. Drejtori ekzekutiv i ASK-së, Avni Kastrati, ka theksuar se këto projeksione nuk janë parashikime absolute, por një kornizë për planifikim strategjik. "Ndryshimet në fertilitet, mortalitet dhe migracion grumbullohen me kalimin e kohës," ka deklaruar ai.

Eksperti Tomas Kucera ka sqaruar se mungesa e të dhënave të besueshme për migracionin e brendshëm dhe ndërkombëtar në nivel komunal ka penguar hartimin e parashikimeve të plota. Ndërkohë, eksperti Eduardo Jongstra ka theksuar se urbanizimi dhe migrimi ndërkombëtar janë faktorët kryesorë që ndikojnë në ndryshimet demografike. "Kosova është një vend migrues," ka thënë ai, duke vënë në dukje se lëvizjet e vazhdueshme të popullsisë jashtë vendit dhe drejt qendrave urbane po ndryshojnë strukturën demografike.

Sipas profileve komunale, Prishtina mbetet komuna me popullsinë më urbane, ndërsa Dragashi ka popullsinë më rurale. Zëvëndësministri i Administrimit dhe Pushtetit Lokal, Agon Batusha, ka theksuar rëndësinë e të dhënave statistikore për hartimin e politikave publike. "Pa të dhëna, vendimet mund të jenë të paplota dhe të dëmshme për qytetarët," ka deklaruar ai.

Projeksionet tregojnë një rënie të shtimit natyror dhe një plakje graduale të popullsisë, gjë që do të kërkojë ndryshime në politikën sociale, shëndetësore dhe ekonomike. Kastrati ka theksuar se raporti duhet të shërbejë si udhërrëfyes për vendimmarrësit, jo si një parashikim i pandryshueshëm.

Burim: Telegrafi
— Redaksia ZHURMA