Pse imami Gazmend Tahirovci u vra në mënyrë mizore në Dragash?

DRAGASH — Gjykata e Prizrenit ka vendosur një muaj paraburgim për të dyshuarin me inicialet B.H., i cili akuzohet për vrasjen e imamit Gazmend Tahirovci në fshatin Zlipotok të Dragashit. Gjykata ka caktuar paraburgim edhe për babain e të dyshuarit, I.H., i cili dyshohet për mosdhënie ndihme ndaj viktimës.

Sipas vendimit të gjykatës, B.H. dyshohet se më 29 qershor 2026, rreth orës 23:00, ka goditur me thikë imamin Tahirovci pas një mosmarrëveshjeje që dyshohet se kishte të bënte me shfrytëzimin e një livadhi. Vrasja karakterizohet si mizore, pasi viktima u godit në shpinë dhe qafë.

Babai i të dyshuarit, I.H., dyshohet se, megjithëse ishte pranë vendit të ngjarjes dhe kishte mundësi të ndihmonte viktimën pa rrezikuar veten, nuk ndërmori asnjë veprim. Gjykata vlerëson se liria e të dyshuarve rrezikon arratisjen dhe pengimin e procedurës hetimore.

Gjyqtari ka theksuar se masa e paraburgimit është e nevojshme për të siguruar prezencën e të dyshuarve dhe për të lehtësuar mbledhjen e provave, duke përfshirë dëshmitë e dëshmitarëve. Hetimi do të vazhdojë për të zbardhur plotësisht ngjarjen.

Ajhan Beqiri, sekretari i Këshillit të Bashkësisë Islame për Rajonin e Gorës, ka shprehur tronditje për vrasjen e Tahirovcit. "Më vjen keq si qytetar, imam dhe zyrtar i Bashkësisë Islame. Çështjet private nuk zgjidhen kështu," ka deklaruar ai, duke kërkuar që organet e drejtësisë të zbardhin rastin sa më shpejt.

Policia ka përdorur njësi të ndryshme, përfshirë dronë dhe njësitë K-9, për të lokalizuar dhe arrestuar të dyshuarin. Tahirovci u gjet i vdekur pasi u godit me një mjet të mprehtë, sipas deklaratës së Policisë.

Vrasja e imamit ka tronditur komunitetin vendor, ndërsa organet e drejtësisë vazhdojnë hetimet për të përcaktuar të gjitha rrethana e motive.

Burim: Kallxo
— Redaksia ZHURMA