Mbi 2 mijë raste të dhunës në familje brenda nëntë muajve në vend
Të dhënat e Policisë së Kosovës tregojnë se deri në shtator janë regjistruar 2052 raste të dhunës në familje, ndërsa tetë gra janë vrarë gjatë vitit 2026.
Redaksia ZHURMA · · 1 min lexim
Vrasja e Arlinda Zekajt nga kunati i saj me sopatë në Vitomiricë të Pejës u bë njëra nga tetë rastet e vrasjes së grave gjatë vitit 2026 nga partnerët, ish-partnerët apo familjarët e tyre. Të dhënat e Policisë së Kosovës dëshmojnë se dhuna në familje vazhdon të jetë e përhapur, ku deri në shtator janë regjistruar 2 mijë e 52 raste, prej të cilave 1 mijë e 626 viktima janë gra. Gjatë vitit paraprak, respektivisht në vitin 2025, ishin regjistruar 2711 raste të dhunës në familje, ku 1931 prej tyre viktimat ishin femra.
Lidhur me trajtimin juridik të rasteve, juristi Anton Nrecaj thekson se ligji në fuqi ngarkon me obligim ligjor jo vetëm viktimat, por edhe personat e tjerë që shohin dhunën për ta raportuar atë. Ai shton se në rastet e rrezikshmërisë së lartë, prokuroria duhet të bashkëpunojë me policinë për veprime bastisjeje dhe konfiskimi të armëve. Nga ana tjetër, sociologu Genx Xerxa përmend si faktorë ndikues shëndetin mendor, rritjen e substancave psikoaktive dhe drogave, mirëqenien socio-ekonomike, si dhe vonesat në proceset gjyqësore që shtyjnë njerëzit drejt vetëgjyqësisë.
