Albert dhe Jeton Sylaj dërgohen në Burgun e Sigurisë së Lartë në Dyz

Albert Sylaj, i dyshuari kryesor për vrasjen e Arlinda Zekajt, dhe Jeton Sylaj janë vendosur në Burgun e Sigurisë së Lartë në Dyz, ku mbahen në pavijone të ndryshme pasi u caktua masa e paraburgimit prej një muaji ndaj secilit prej tyre.

Siç raportoi Zhurma më 29.10.2026, zhvillimet e fundit sollën suspendime të zyrtarëve dhe protesta, ndërsa u rikthyen qëndrimet e dikurshme lidhur me trajtimin e rasteve të dhunës në familje në institucionet e sigurisë dhe drejtësisë.

Sipas Prokurorisë, vrasja e Arlinda Zekajt ka ndodhur natën e 25.10.2026 në shtëpinë e saj në Vitomiricë të Pejës, pasi ajo ishte kthyer nga stacioni policor ku kishte raportuar dhunën nga ana e ish-bashkëshortit të saj, Jeton Sylaj. Në kërkesën për caktimin e paraburgimit, Prokuroria ka bërë të ditur se i dyshuar kryesor për vrasjen me sëpatë është ish-kunati i viktimës, Albert Sylaj, i cili dyshohet se e ka kryer këtë vepër nga hakmarrja e paskrupullt për ndalimin e vëllait të tij nga Policia. Dosja e Prokurorisë thekson se krimi ka ndodhur në prani të djalit të mitur të viktimës, fëmijëve të mitur të dorasit dhe nënës së dorasit. Po ashtu, Prokuroria ka njoftuar se Albert Sylaj ishte arratisur nga data 25 deri më 27 tetor 2026 dhe se ai është i dënuar me katër aktgjykime të formës së prerë. Jeton Sylaj ndërkaq është arrestuar nën dyshimin për mospërfillje të gjykatës, ndërsa ndaj tij ekziston edhe një aktakuzë për kanosjen e ish-gruas së tij.

Inspektorati Policor i Kosovës ka rekomanduar suspendimin e drejtorit të Stacionit të Policisë në Pejë, Agron Hasanaj, si dhe të dhjetë zyrtarëve të tjerë policorë të hierarkisë komanduese. Ndërkaq, Këshilli Prokurorial i Kosovës ka marrë vendim që të suspendojë nga detyra kryeprokuroren e Prokurorisë së Pejës, Lumturije Vuçetaj, si dhe zëvendëskryeprokuroren e Pejës dhe njkohësisht koordinatoren për rastet e dhunës në familje, Arlinda Nallbani-Gacaferri. Përveç këtyre masave institucionale, Kolektivi për Mendim dhe Veprim Feminist ka mbajtur protesta duke kërkuar shkarkim, ndjekje penale dhe burgosje të personave në krye të institucioneve të drejtësisë.

Në një audio-incizim të publikuar në emisionin MAT të Klan Kosova, dëgjohet biseda mes Arlinda Zekajt dhe policit Faruk Muçolli, ku ajo i thotë: «Faruk të lutem. Të lutem, unë vrahem… Nuk ka lidhje, po ju keni me u përgjigj». Polici Faruk Muçolli dëgjohet duke iu përgjigjur: «Unë ty personalisht më s’kam me të pranu. S’e kam obligim me u marrë me ty…, se jemi lodhë».