Apeli i Speciales pranon kërkesën për 7 mijë fjalë në ankesat e katërshes

Dhoma e Apelit në Dhomat e Specializuara të Kosovës në Hagë ka miratuar pjesërisht kërkesën e mbrojtjes për rritjen e kufirit të fjalëve në njoftimet e apelit kundër aktgjykimit të shkallës së parë për Hashim Thaçin, Kadri Veselin, Rexhep Selimin dhe Jakup Krasniqin. Sipas vendimit të bërë publik, trupi gjykues ka autorizuar mbrojtjen që njoftimet e apelit të përmbajnë deri në 7 mijë fjalë, duke e ngritur kufirin nga ai i zakonshmi prej 3 mijë fjalësh.

Mbrojtja kishte kërkuar fillimisht që ky kufi të rritej në 9 mijë fjalë, me arsyetimin se kompleksiteti dhe gjatësia e rastit kërkojnë hapësirë shtesë për të paraqitur bazat e ankesës. Në vendimin e saj, gjykata ka marrë parasysh se aktgjykimi i shkallës së parë përmban 2.089 faqe dhe përbën aktgjykimin më të gjatë të nxjerrë ndonjëherë nga Dhomat e Specializuara.

Megjithatë, trupi gjykues vlerësoi se kërkesa për 9 mijë fjalë ishte e tepruar, duke shtuar se efektiviteti dhe cilësia e një ankese nuk varen nga gjatësia, por nga qartësia e argumentimit. Apeli ka kujtuar se njoftimet duhet të identifikojnë gabimet e pretenduara dhe zgjidhjen e kërkuar, ndërsa argumentet e hollësishme shtjellohen në parashtresa. Afati për dorëzimin e njoftimeve të apelit është caktuar.