Ardian Gjini: Pal Lekaj s’ka asnjë funksion në Aleancë

Kryetari i Aleancës, Ardian Gjini, ka kërkuar nga ministri i Financave, Hekuran Murati, si dhe nga Dimal Basha, që të sqarojnë se ku kanë përfunduar 53 milionë eurot. Duke përmendur se Qeveria ndodhet në pushtet prej gjashtë vjetësh, ai ka theksuar se ekzekutivi duhet të ofrojë përgjigje për destinacionin e këtyre mjeteve financiare. «Ka mujt me dalë ministri i Financave me thanë që 53 milionët kanë shku në këtë llogari, edhe me tregu e kujt është ajo llogari. Nuk duan me u marrë me këtë temë», ka deklaruar ndër të tjera Gjini gjatë prononcimit të tij.

Gjini e ka krahasuar këtë situatë me thirrjen «Drejtësi për Astrit Deharin», duke vlerësuar se logjika e trajtimit është e njëjtë, pavarësisht se bëhet fjalë për raste të ndryshme, ndërsa ka përmendur se akuzohen të tjerët dhe se sipas tij zhduken edhe provat. Sa i përket statusit të Pal Lekajt, kryetari i Aleancës ka bërë të ditur se ai nuk mban asnjë detyrë zyrtare në parti, nuk është pjesë e Kryesisë apo e Këshillit të Përgjithshëm, si dhe nuk figuron në listën e kandidatëve për deputetë.