Marta Kos prezanton Paketën e Zgjerimit të BE-së më 4 nëntor

Komisionerja Evropiane për Zgjerimin, Marta Kos, do të prezantojë më 4 nëntor Pakon e Zgjerimit për vitin 2026, sipas njoftimit të dhënë nga Parlamenti Evropian. Dokumenti përmban vlerësimet e Komisionit Evropian mbi ecurinë e dhjetë vendeve që synojnë anëtarësimin në Bashkimin Evropian, duke përfshirë Shqipërinë, në zbatimin e reformave të kërkuara.

Pas këtij publikimi, raportuesit e përhershëm të Komitetit për Punë të Jashtme do të hartojnë projektrezoluta të veçanta për çdo shtet, të cilat do të pasqyrojnë qëndrimet dhe rekomandimet zyrtare. Më 5 nëntor, institucioni do të mbajë gjithashtu diskutime lidhur me instrumentet financiare mbështetëse për Ballkanin Perëndimor, Moldavinë dhe Ukrainën.

Gjatë takimeve të përbashkëta mes Komitetit për Punë të Jashtme dhe atij për Buxhete, eurodeputetët do të shqyrtojnë ecurinë e dialogjeve dhe fondeve për këto rajone. Drejtori i Përgjithshëm për Fqinjësi dhe Negociata për Zgjerim, Gert Jan Koopman, do të informojë zyrtarët evropianë rreth shpërndarjes së mbështetjes financiare dhe zbatimit të agjendave përkatëse.