FSK dhe ushtria shqiptare mbajnë trajnim për kërkim-shpëtimin malor

Pjesëtarë të Forcës së Sigurisë së Kosovës dhe Forcave të Armatosura të Republikës së Shqipërisë kanë përmbyllur një stërvitje të përbashkët trejavore në fushën e kërkim-shpëtimit malor. Aktiviteti u zhvillua në kuadër të planit të bashkëpunimit dypalësh, duke përfshirë nivelet bazik dhe të avancuar për të gjithë pjesëmarrësit.

Gjatë kësaj periudhe, pjesëmarrësit u angazhuan në përmirësimin e aftësive profesionale dhe praktike përmes zbatimit të teknikave të ndryshme. Qëllimi kryesor i këtij angazhimi ishte ngritja e gatishmërisë dhe e kapaciteteve operacionale për ndërhyrje në terrene të vështira malore.

Sipas FSK-së, ky aktivitet dëshmon përkushtimin e përbashkët për avancimin e bashkëpunimit ndërmjet dy forcave, shkëmbimin e përvojave dhe zhvillimin e kapaciteteve profesionale në këtë fushë.