Hoxha: Shqipëria krah Italisë pas rrëzimit të helikopterit në Bosnjë

Ministri për Evropën dhe Punët e Jashtme, Ferit Hoxha, ka përcjellë ngushëllimet për familjarët e viktimave pas aksidentit ajror pranë Brçkos, ku u përfshi një helikopter i misionit të EUFOR-it. Tragjedia në Bosnjë-Hercegovinë shkaktoi humbjen e tri jetëve dhe la dymbëdhjetë persona të lënduar.

Nëpërmjet një postimi në platformën X, kryediplomati shqiptar shprehu solidaritetin me Qeverinë dhe popullin e Italisë, ndërsa u uroi shërim të shpejtë të gjithë të plagosurve. «Në këtë moment të vështirë, Shqipëria qëndron fuqimisht krah Italisë, vendit mik dhe aleat në NATO, si dhe në krah të gjithë komunitetit të EUFOR-it, ku personeli shqiptar shërben me krenari përkrah kolegëve italianë dhe ushtarakëve të tjerë, në një angazhim të përbashkët për paqen dhe stabilitetin në Bosnjë-Hercegovinë», u shpreh Hoxha.