Ambasada e Kosovës në Austri takon përfaqësuesit e mësuesve

Ambasada e Republikës së Kosovës në Austri zhvilloi një takim me përfaqësuesit e Shoqatës së Mësuesve Shqiptarë “Naim Frashëri”, ku u diskutua për ruajtjen e gjuhës shqipe dhe avancimin e arsimit shqip te fëmijët në Austri. Takimi u mbajt më 24 tetor, ku i Ngarkuari me Punë, Albinot Bimbashi, bashkë me diplomatët Valon Krasniqi, Dhurata Selimi dhe Marigonë Vrajolli, pritën kryetarin Osman Ademi dhe disa mësimdhënës.

Gjatë bisedës u trajtuan sfidat e mësuesve, rëndësia e shtimit të numrit të nxënësve në mësimin e gjuhës shqipe dhe nevoja për kushte më të mira të mësimdhënies. Ambasada theksoi se mbështetja e arsimit në gjuhën amtare shërben si faktor kyç për ruajtjen e identitetit kombëtar të breza të rinj. Përfaqësuesve të shoqatës iu dorëzuan libra shkollorë për klasat I–IX, të dedikuar për nxënësit shqiptarë në këtë shtet.