Etika përjashton Berishën dhe pesë deputetë të opozitës
Sekretariati i Etikës ka vendosur masat disiplinore pas seancës së tensionuar plenare në Kuvend.
Redaksia ZHURMA · · 2 min lexim
Sekretariati për Procedurat, Votimet dhe Etikën ka ndëshkuar kryetarin e Partisë Demokratike, Sali Berisha, me dhjetë ditë përjashtim nga punimet e Kuvendit, ndërsa pesë deputetë të tjerë të opozitës janë dënuar me nga gjashtëdhjetë ditë. Masa disiplinore vjen pas zhvillimeve në seancën plenare ku pati tensione, bllokim të foltores dhe ndezje flakadanësh.
Gjatë seancës që solli ndërhyrjen e Etikës, kreu i PD-së Berisha bllokoi foltoren dhe deklaroi se qeveria meriton «plumbat e gomës e kafka të thyera», fjalë të cilat u cilësuar si thirrje për dhunë nga kryetari i Kuvendit, Niko Peleshi, i cili ia hoqi të drejtën e fjalës. Sipas socialistëve, kreu i demokratëve përdori gjuhë nxitëse urrejtjeje dhe fjalor joparlamentar.
Deputetët e tjerë të dënuar me gjashtëdhjetë ditë largim nga seancat janë Albana Vokshi, Blendi Himçi, Xhelal Mziu, Ivi Kaso dhe Bledion Nallbati, për të cilët u konstatua se ndezën flakadanë dhe penguan zhvillimin normal përmes zhurmës e rrëmujës. Për shkak të kaosit në sallë, Kuvendi kaloi drejtpërdrejt në votim pa diskutime, ku u sigurua numri i nevojshëm për miratimin e projektligjit për Bankën e Shqipërisë me praninë e shkurtër të kryeministrit Edi Rama dhe deputetes Belinda Balluku, ndërsa për Klodiana Çapjan nuk u mor masë.
