Presidenti Begaj dekreton 9 majin 2027 për zgjedhjet vendore

Presidenti i Republikës, Bajram Begaj, ka dekretuar datën 9 maj 2027 për zhvillimin e zgjedhjeve të ardhshme për organet e qeverisjes vendore në Shqipëri, pas konsultimeve institucionale me përfaqësues të forcave politike të Kuvendit dhe Komisionerin Shtetëror të Zgjedhjeve.

Sipas Kodit Zgjedhor, zgjedhjet e ardhshme për organet e qeverisjes vendore duhet të zhvillohen brenda periudhës zgjedhore të pranverës, e cila përfshin katër të diela nga data 15 prill deri më 15 maj. Për caktimin e kësaj date, Presidenca zhvilloi një tryezë konsultimi ku morën pjesë Grupi Parlamentar i Partisë Socialiste, Partia Socialdemokrate dhe Komisioneri Shtetëror i Zgjedhjeve, ndërsa subjektet e tjera politike nuk iu përgjigjën ftesës dhe nuk morën pjesë në këto takime.

Në njoftimin zyrtar të bërë publik nga Presidenca theksohet se Komisioneri Shtetëror i Zgjedhjeve ishte ai që propozoi datën 9 maj, duke argumentuar se caktimi i kësaj dite do t'u sigurojë institucioneve më shumë kohë për përgatitjen dhe marrjen e masave zbatuese. Sipas të njëjtit njoftim, edhe Partia Socialdemokrate shprehu parapëlqimin e saj për këtë datë, ndërsa subjektet e përfshira në konsultë u treguan të hapura për secilën zgjidhje. Presidenca sqaroi se data e përzgjedhur nuk lidhet me asnjë favorizim të palëve politike dhe nuk cenon vullnetin e lirë të zgjedhësve.

Kryetari i grupit parlamentar të Partisë Socialiste, Taulant Balla, u shpreh se Partia Socialiste do të konkurrojë në zgjedhjet vendore të kësaj date me objektivin e fitores në 46 bashki të vendit. Balla theksoi se kjo datë përkon me Ditën e Europës dhe se viti 2027 është vendimtar për mbylljen e negociatave dhe procesin e anëtarësimit të Shqipërisë në Bashkimin Evropian.

Presidenti i Republikës u bëri thirrje subjekteve politike që të marrin pjesë në zgjedhje me alternativa, platforma dhe kandidatë në lartësinë e këtij procesi. Kreu i shtetit kërkoi nga palët që të zhvillojnë një proces konkurrues të drejtë, të përkushtuar e luajal, të respektojnë kuadrin ligjor dhe barazinë e armëve, si dhe të bashkëpunojnë ngushtë me Komisionin Shtetëror të Zgjedhjeve për një proces shembullor në përputhje me standardet e larta të një shoqërie demokratike.