Mali i Zi arrin 23 kapituj të mbyllur drejt anëtarësimit në Bashkimin Evropian

Mali i Zi ka arritur në 23 kapituj të mbyllur përkohësisht me Bashkimin Evropian pas një Konference Ndërqeveritare në Bruksel, ku u miratua mbyllja e kapitullit 1 për lëvizjen e lirë të mallrave dhe kapitullit 12 për sigurinë ushqimore dhe politikat veterinare e fitosanitare. Hapi i fundit u shënua të premten, më 6 nëntor, ndërsa ndërkohë të hapur mbeten edhe 10 kapituj të tjerë negociatash.

Ky proces përfshin edhe territoret ku jetojnë shqiptarët, kryesisht në Ulqin, Tuz, Plavë e Guci, të cilët përf-itojnë perspektivën për t'u bërë qytetarë të Bashkimit Evropian në një të ardhme të afërt. Sipas të dhënave historike, Ulqini është vatra e shqiptarëve të Malit të Zi, e njohur si Olciniumi i ilirëve, kështjella e Balshajve, strehë korsarësh dhe vend syrgjyni për Sabatai Cevin, i cili u dha më 1880 në vend të Plavës e Gusisë.

Pas këtij përparimi, kryeministri Milojko Spajiq deklaroi se Mali i Zi dërgoi mesazhin se është gati për fazën përfundimtare të integrimit evropian. Sipas planeve të paraqitura nga Podgorica, negociatat synohet të përfundojnë deri në dhjetor 2026, kurse Traktati i Anëtarësimit pritet të nënshkruhet në qershor 2027.

Kalendari i afateve parasheh që gjatë nëntorit të mbyllen edhe pesë kapituj të tjerë, ndërsa për muajin dhjetor janë planifikuar kapitujt 23 dhe 24, të cilat mbulojnë gjyqësorin, sundimin e ligjit dhe luftën kundër korrupsionit. Nga ana e tij, Brukseli ka bërë të qartë se këto afate mbeten thjesht orientuese dhe se çdo prapakthim në zbatimin e reformave mund të sjellë shtyrjen e anëtarësimit.

Pasi të arrihet nënshkrimi i traktatit, dokumenti do të kërkojë ratifikimin e detyrueshëm nga të 27 shtetet anëtare të Bashkimit Evropian, si dhe nga vetë Mali i Zi. Ritmi i deritanishëm i Podgoricës shënon kontrast me vendet e tjera të rajonit, pasi Shqipëria ka mbyllur vetëm katër kapituj, kurse Kosova mbetet i vetmi vend në Ballkanin Perëndimor që nuk ka statusin e kandidatit.