Rosamund Pike protagoniste në filmin horror “Feed”

Aktorja britanike Rosamund Pike do të jetë protagoniste dhe producente e filmit të ri horror «Feed», i cili trajton anën e errët të rrjeteve sociale, obsesionin për famë dhe ambiciet prindërore, sipas mediumit amerikan «Deadline». Data e lansimit të filmit ende nuk është bërë e ditur.

Ylli i filmit «I Care a Lot» do të interpretojë personazhin e Erin, një nënë të dëshpëruar që zbulon një suplement të pazakontë bukurie, i cili premton ta shndërrojë vajzën e saj gjimnaste në një yll të rrjeteve sociale, ka njoftuar «Deadline». Historia është frymëzuar nga filmi finlandez «Hatching», i publikuar në vitin 2022. Regjinë e filmit do ta bëjë Leslye Headland, e njohur për serialin «Russian Doll», ndërsa skenari është shkruar nga Daniella Isaacs.

Sipas Sinjali-t dhe Koha.net-it, Pike ka treguar se prej kohësh dëshironte të realizonte një projekt që trajton varësinë nga rrjetet sociale dhe obsesionin modern për famën. «Prej kohësh kam dashur të realizoj një film që luan me obsesionin tonë ndaj rrjeteve sociale, përmirësimit të vetes dhe dëshirës për famë pa pasur domosdoshmërisht ndonjë talent të veçantë. Por edhe me anën e frikshme të mëmësisë moderne», u shpreh aktorja, duke shpjeguar se personazhi i saj beson se suksesi dhe fama do ta mbrojnë vajzën nga vështirësitë. Ndërkaq, regjisorja Leslye Headland e ka cilësuar skenarin si një histori shqetësuese, por thellësisht njerëzore. «Është një histori e guximshme, shqetësuese dhe thellësisht njerëzore. Rosamund është një nga aktoret më të guximshme që punojnë sot dhe nuk mund të kërkoja bashkëpunëtore më të mirë për të eksploruar anët më të errëta të kësaj historie», u shpreh ajo.