Dëmtimet penalizuan Partizanin: Kërnaja kurrë pa grup të plotë

TIRANË — Numri i lartë i dëmtimeve ka qenë pa diskutim problemi më i madh i Partizanit gjatë këtij sezoni, element që ndikoi ndjeshëm në ecurinë e skuadrës dhe në rezultatet e arritura përgjatë kampionatit. Të kuqtë u shfaqën shpeshherë të pafat, teksa shumë prej lojtarëve kryesorë munguan për periudha të ndryshme për shkak të problemeve fizike. Dëmtimet e shumta i penalizuan kryeqytetasit sidomos në momentet më të rëndësishme të sezonit, aty ku skuadra kishte nevojë për vazhdimësi në formacion dhe stabilitet në lojë.

Ndër dëmtimet më të rënda shquhet ai i sulmuesit Albers Keko, i cili pësoi një dëmtim serioz në ligamentin e gjurit. Problemi e mbajti lojtarin për kohë të gjatë larg fushave dhe i hoqi Partizanit një alternativë të rëndësishme në repartin ofensiv. Rikthimi i Kekos erdhi vetëm në fundin e sezonit, atëherë kur objektivat e skuadrës ishin komplikuar ndjeshëm.

Probleme të shumta fizike pati edhe mesfushori Arafat Dumbia, njëri prej lojtarëve më të rëndësishëm të të kuqve. Mungesa e tij në disa ndeshje kyçe uli ndjeshëm forcën dhe balancën e Partizanit në repartin qendror. Edhe Marku dhe Skuka — lojtar që pritej të kishte rol të rëndësishëm në repartin ofensiv — vuajtën dëmtime gjatë sezonit.

Lista e futbollistëve me probleme fizike nuk ndaloi vetëm me ta: edhe Sulo, Martinez, Nondi, Fadairo dhe Atanaskoski u përballën me dëmtime gjatë kampionatit. Trajneri Oltijon Kërnaja kurrë nuk e pati grupin e plotë në dispozicion, duke u detyruar stafi teknik të ndryshonte shpesh rreshtimin dhe të improvizonte në disa reparte të fushës.

Përtej problematikave të tjera që shoqëruan Partizanin këtë sezon, dëmtimet mbeten si njëra nga arsyet kryesore që penguan ekipin të kishte stabilitet dhe të shfrytëzonte potencialin e plotë të organikës. Në një kampionat të gjatë me shumë ndeshje vendimtare, mungesa e vazhdueshme e disa prej lojtarëve kryesorë pati ndikim të drejtpërdrejtë në ecurinë negative të të kuqve.

Burim: BalkanWeb
— Redaksia ZHURMA