Komisioni Evropian synon heqjen e tarifave të roamingut në fillim të vitit të ardhshëm

Komisioni Evropian ka nisur negociatat dypalëshe me gjashtë vendet e Ballkanit Perëndimor, duke synuar që qytetarët e rajonit dhe ata që udhëtojnë drejt Bashkimit Evropian të përdorin telefoninë mobile pa pagesat shtesë aktuale. Nisma, e paralajmëruar nga presidentja e Komisionit Evropian, Ursula von der Leyen, gjatë vizitës në rajon në tetor, përfshin përdorimin e thirrjeve, mesazheve dhe internetit sipas kushteve të paketave vendore.

Procesi parasheh që Komisioni të negociojë veçmas me secilin partner rajonal, ndërsa vendet duhet të harmonizojnë rregullat dhe legjislacionin e tyre me standardet e Bashkimit Evropian, duke përfshirë çështjet rregullatore dhe bashkëpunimin ndërmjet operatorëve të telekomunikacionit. Pas përfundimit të marrëveshjeve dypalëshe dhe konfirmimit të përmbushjes së kërkesave, Komisioni do t'i propozojë Këshillit të BE-së zgjerimin e zonës së roamingut, me synim që heqja e tarifave të realizohet në fillim të vitit të ardhshëm.