Komisioni Evropian: TikTok rrezikon shëndetin e përdoruesve

Komisioni Evropian kërkoi nga platforma TikTok ndryshimin e mënyrës se si funksionon faqja «For You», pasi sipas rezultateve paraprake hulumtuese aplikacioni rrezikon shëndetin e përdoruesve. Ky zhvillim vjen pas shqetësimeve se algoritmi i platformës u shfaq personave veçanërisht të cenueshëm një rrjedhë të pafund videosh të personalizuara, duke nxitur rrezikun e varësisë, ankthin dhe çrregullimet e të ngrënit. Brukseli thekson se masat e deritanishme mbrojtëse kanë rezultuar të paefektshme dhe se butoni «Nuk jam i interesuar» nuk mjafton për të ndryshuar rekomandimet në rrjedhën e videove.

Autoriteti në Bruksel paralajmëroi se koncerni mund të përballet me një ndëshkim dhe gjobë të rëndë për shkak të efekteve negative në mirëqenien mendore. Sipas vlerësimeve, algoritmi personalizon përmbajtje që mund të jenë emocionalisht të dëmshme, ndërsa ekspozimi i vazhdueshëm ndaj tyre mund të përforcojë probleme ekzistuese psikologjike te fëmijët dhe të rinjtë. Për më tepër, institucioni evropian kërkon që algoritmi të mos bazohet më në kohën që përdoruesit kalojnë duke parë një video, por t'i jepet atyre më shumë kontroll mbi përmbajtjen që u shfaqet në ekran.