Krahasimi i projektbuxheteve të vitit 2027 për vendet e rajonit

Shqipëria ka planifikuar shpenzime prej rreth 10.7 miliardë eurosh për vitin 2027, më shumë se Kosova dhe Maqedonia e Veriut. Me një popullsi prej rreth 2.36 milionë banorësh, kjo shumë përkthehet në rreth 4,534 euro për banor. Maqedonia e Veriut ka paraparë shpenzime prej 7.22 miliardë eurosh, të cilat me rreth 1.83 milionë banorë përbëjnë rreth 3,945 euro për banor. Kosova ka planifikuar një projektbuxhet prej 4.27 miliardë eurosh për rreth 1.59 milionë banorë, ku shpenzimet buxhetore arrijnë në rreth 2,686 euro për banor.

Mali i Zi kishte projektuar shpenzime buxhetore prej 3.364 miliardë eurosh për vitin 2027, sipas Strategjisë Fiskale 2024–2027 të miratuar nga Qeveria më 5 shtator 2024. Kjo shumë përkthehet në rreth 5,399 euro për banor, bazuar në një popullsi të vlerësuar prej 623,115 banorësh në mesin e vitit 2025, megjithëse kjo shifër mbetet projeksion i një dokumenti afatmesëm dhe jo projektbuxhet përfundimtar. Ndërkohë, Serbia është përfshirë në krahasim me buxhetin e vitit 2026 prej rreth 23.5 miliardë eurosh, pasi ende nuk ka publikuar projektbuxhetin për vitin 2027 pas zgjedhjeve parlamentare të mbajtura në tetor. Për një popullsi prej 6.64 milionë banorësh, kjo rezulton në rreth 3,539 euro shpenzime buxhetore për banor. Krahasimi i këtyre shifrave nuk pasqyron domosdoshmërisht nivelin e zhvillimit ekonomik apo mirëqenien e qytetarëve, pasi financat publike varen nga strukturat shtetërore, politikat fiskale dhe detyrimet.