Pse u refuzua plani urbanistik i Kodrës së Diellit?
Ministria e Transportit e ka refuzuar dy herë planin, ndërsa ministri Aleksandar Nikolloski thotë se faji nuk qëndron te dikasteri i tij
Redaksia ZHURMA · · Përditësuar · 1 min lexim
TETOVË — Zhvillimi i Kodrës së Diellit vazhdon të mbetet peng i mungesës së Planit të Detajuar Urbanistik. Edhe pse Komuna e Tetovës e ka përgatitur këtë plan, sipas informacioneve, ai është refuzuar dy herë nga Ministria e Transportit.
I pyetur për këtë ngatërresë institucionale, ministri Aleksandar Nikolloski thotë se faji nuk qëndron te dikasteri i tij, por te Drejtoria për Mbrojtje dhe Shpëtim, duke drejtuar gishtin nga bllokadat politike.
Nga ana tjetër, kreu i Komunës së Tetovës, Bilall Kasami, premton se në seancën e radhës të Këshillit, ky plan do të futet në votim. Sipas tij, projekti garanton një transformim rrënjësor që përfshin ndërtimin e hoteleve të reja dhe të një teleferiku që do të lidhë qytetin me qendrën turistike.
Edhe pse kreu i komunës ka premtuar disa herë se në Kodrën e Diellit do të vijnë investitorë të huaj, e së fundmi u përmendën grupe biznesi nga Katari, deri më tani në këtë pikë turistike nuk ka asnjë investim konkret në terren.
Burim: TV21, https://tv21.tv/kodra-e-diellit-pret-planin-urbanistik-kasami-dhe-nikolloski-premtojne-zhvillim-turistik/
— Redaksia ZHURMA
