Kamenica merr 500 mijë euro për banim social nga Qeveria
Me nënshkrimin e memorandumit, Kamenica përfitoi 500 mijë euro për renovimin dhe rindërtimin e 30 njësive banesore.
Redaksia ZHURMA · · 1 min lexim
Komuna e Kamenicës do të përfitojë 500 mijë euro nga Qeveria e Kosovës përmes Projektit të Banimit Social Adekuat. Lajmin e bëri të ditur ministrja në detyrë e Mjedisit dhe Planifikimit Hapësinor, Fitore Pacolli, e cila nënshkroi memorandum bashkëpunimi me kryetarin e komunës, Kadri Rahimaj.
Investimi parashikon ndërhyrje në 30 njësi dhe shtëpi përfituese. Konkretisht, 20 njësi ekzistuese të banimit social do të renovohen, ndërsa 7 shtëpi private do të mbështeten për renovim dhe 3 të tjera për rindërtim.
Në takim morën pjesë edhe nënkryetarja Arta Bajralija dhe zyrtarja nga Qendra për Punë Sociale, Vlera Bugaqku. Pacolli theksoi se ky investim synon përmirësimin e kushteve të banimit dhe mbështetjen e familjeve në nevojë.
