Incidentet pas 20 qershorit 1999 nuk cilësohen krime lufte

Gjatë shpalljes së aktgjykimit në Dhomat e Specializuara të Kosovës në Hagë, trupi gjykues ka dhënë qëndrimin e tij rreth periudhës kohore dhe elementeve të aktakuzës. Kryetari i trupit gjykues, Charles L. Smith III, ka theksuar se ngjarjet dhe incidentet e shqyrtuara që kanë ndodhur pas datës 20 qershor 1999 nuk mund të cilësohen si krime lufte.

Sipas shpjegimeve të dhëna në seancë, këto raste kanë ndodhur pas përfundimit të konfliktit të armatosur midis Ushtrisë Çlirimtare të Kosovës dhe forcave serbe. Paneli gjykues ka vlerësuar se në atë kohë normat përkatëse nuk zbatoheshin më ndaj personave në fjalë, duke përjashtuar kështu mundësinë e klasifikimit të tyre si krime lufte.