Nis pastrimi i ujësjellësit në Gostivar — ujë teknik deri në fund të javës
Ekipet nga Shkupi janë kyçur në pastrimin e rrjetit, ndërsa uji i pijshëm parashihet të kthehet deri në fund të javës së ardhshme.
GOSTIVAR — Pastrimi i tërë sistemit të ujësjellësit në Gostivar ka filluar me angazhimin e ekipeve të posaçme, me synimin që deri në fund të kësaj jave banorët të kenë qasje në ujë për përdorim teknik. Lajmi u bë i ditur nga kryeministri Hristijan Mickoski, i cili njoftoi se procesi i klorinimit dhe pastrimit ka nisur tashmë.
Ky aksion pason situatën e rëndë ku autoritetet lokale morën vendim që të ndalohet uji i çezmës në të gjithë qytetin. Sipas planit të ri, pas sigurimit të ujit teknik, ekipet e specialistëve do të vazhdojnë punën intensive edhe për një javë tjetër që uji të jetë i sigurt për pije.
Për të realizuar këtë projekt janë kyçur ekspertë dhe ekipet e Ujësjellësit të Shkupit, të cilët po punojnë për të sjellë klorin në kufijtë e lejuar teknikë. Ky angazhim i përbashkët pritet të kthejë normalitetin në furnizim pas krizës së fundit me ndotjen.
Burim: Alsat-M
— Redaksia ZHURMA