Sa e vërtetë është përzierja e ujërave të zeza në Gostivar?

GOSTIVAR — Kryetari i Komunës së Gostivarit, Valbon Limani, i ka hedhur poshtë pretendimet për përzierje të ujërave të zeza me ujin e pijshëm në qytet. Sipas Limanit, informacionet e marra nga NP “Komunalec” vërtetojnë se në lokacionin ku janë ngritur dyshimet nuk ekziston fare rrjet i kanalizimit, gjë që e bën teknikisht të pamundur skenarin e raportuar.

Kjo polemikë nisi pasi një numër i madh i qytetarëve të Gostivarit janë paraqitur në spital gjatë ditëve të fundit me shqetësime në stomak. Ndërsa qytetarët dyshojnë te ujësjellësi i Gostivarit, kryetari komunal insiston se deri më tani nuk ka asnjë dëshmi zyrtare mjekësore apo laboratorike që të lidhë këto raste me ujin e qytetit.

Limani deklaroi se mostrat e analizuara nga NP “Komunalec” kanë rezultate pozitive, ku parametrat e ujit janë konstatuar brenda vlerave të lejuara me ligj. Ai theksoi se shkaku i vërtetë i shqetësimeve në lukth duhet të përcaktohet në mënyrë profesionale dhe mbi bazën e analizave përkatëse, jo përmes thashethemeve.

Komuna e Gostivarit ka deklaruar se është në kontakt të vazhdueshëm me të gjitha institucionet kompetente për të sqaruar situatën. Limani u ka bërë thirrje qytetarëve që të qëndrojnë të qetë, të respektojnë ndalimin e përkohshëm të përdorimit të ujit dhe të informohen vetëm nga burimet zyrtare për të shmangur panikun.

Rezultatet zyrtare të analizave do të publikohen në mënyrë të plotë dhe transparente sapo të jenë në dispozicion të institucioneve. Përgjegjësia e komunës, sipas Limanit, është vërtetimi i fakteve, ndërsa qytetarët janë thirrur të mos përhapin informacione të paverifikuara gjatë kësaj procedure.

Burim: TV21
— Redaksia ZHURMA