Si do të jetë Durrësi qytet mbështetës për sportet ujore në Lojërat Mesdhetare 2030?
Takim koordinues mes Kosovës dhe Shqipërisë për organizimin e Lojërave Mesdhetare, me pjesëmarrjen e drejtuesve të Komiteteve Olimpike të dyja vendeve.
PRISHTINË — Ministri shqiptar i sportit, Blendi Gonxhja, njoftoi një takim koordinues mes drejtuesve të institucioneve sportive të Kosovës dhe Shqipërisë për Lojërat Mesdhetare “Prishtina 2030”. Në fokus ishte organizimi i ngjarjes dhe roli i Durrësit si qytet mbështetës për sportet ujore.
Në takim morën pjesë Presidenti i Lojërave Mesdhetare “Prishtina 2030”, Julian Pace Bonello (njëherësh President i Komitetit Olimpik të Maltës), Sekretari i Përgjithshëm i ICMG-së, Iakovos Filippousis, Presidenti i Komitetit Olimpik të Kosovës, Ismet Krasniqi, këshilltari i Ministrit të Sportit të Kosovës, Drilon Brahimi, dhe Presidenti i Komitetit Olimpik Kombëtar Shqiptar, Fidel Ylli.
Gjatë takimit u diskutuan inspektimet dhe koordinimi i përgjithshëm i organizimit. Pace Bonello vlerësoi mikpritjen dhe progresin e sportit shqiptar, duke theksuar bashkëpunimin strategjik mes institucioneve të dyja vendeve.
Burim: RTV21
— Redaksia ZHURMA