Haxhijaj: Përplasjet mes dy drejtuesve po rrezikojnë Lojërat Mesdhetare

Ish-sekretari i Komitetit Olimpik të Kosovës, Shasivar Haxhijaj, paralajmëroi se përplasjet personale mes dy figurave po e rrezikojnë seriozisht organizimin e Lojërave Mesdhetare Prishtina 2030. I ftuar në emisionin SportCast, ai theksoi se një dështim i mundshëm i këtij projekti madhor do të dëmtonte rëndë imazhin ndërkombëtar të vendit dhe do të bënte të pamundur marrjen e ngjarjeve të tjera elitare.

Përplasjet rreth këtij organizimi kanë qenë në qendër të vëmendjes edhe më parë, siç raportoi Zhurma më 20 tetor 2026, kur kryetari i Prishtinës, Përparim Rama, e akuzoi qeverinë për neglizhim të komunikimit me Bordin Ndërkombëtar të Lojërave Mesdhetare pasi emailet zyrtare të ICMG-së kishin mbetur pa përgjigje.

Sipas Haxhijajt, projekti i Lojërave Mesdhetare Prishtina 2030 përbën një nga iniciativat më kryesore sportive për vendin, duke shërbyer si mundësi për zhvillimin e infrastrukturës lokale dhe për promovimin e kapaciteteve organizative në nivel global. Ish-sekretari i KOK-ut sqaroi se sukseset e arritura në arenën ndërkombëtare, veçanërisht pesë medaljet olimpike ku hyjnë tri të arta, si dhe sukseset në kampionatet evropiane, mesdhetare e botërore të federatave elitare, kanë qenë faktori kryesor në ndërtimin e imazhit shtetëror.

Ai vlerësoi se ndryshimi rrënjësor i perceptimit ndërkombëtar për Kosovën ka nisur që nga medalja e parë olimpike e fituar nga xhudistja Majlinda Kelmendi, çka bëri që komuniteti sportiv global ta vlerësojë vendin me dinjitet. Megjithatë, ai shprehu shqetësimin se përplasjet e tanishme për motive bajraktarizmi po e vënë në pikëpyetje të ardhmen e sportit kosovar.

Në lidhje me rrjedhën e ngjarjeve, Haxhijaj vlerësoi se nëse Kosova nuk arrin ta realizojë këtë garë sportive për shkak të mosdurimit mes dy drejtuesve, komuniteti ndërkombëtar do të hezitojë t'i besojë vendit organizimin e garave serioze për të paktën 20 apo 30 vitet e ardhshme. Ai u kërkoi palëve të përfshira që t'i tejkalojnë mosmarrëveshjet personale për të mbrojtur interesin e përgjithshëm shtetëror.

«Nëse ka diçka në Kosovë që është krijuar për ta përmirësuar imazhin e Kosovës, le ta di secili, që sporti i Kosovës ka qenë ai që i ka dhënë imazh Kosovës. Edhe ato sidomos medaljet e arritura, duke përfshirë tre medaljet e arta në Lojëra Olimpike, pastaj dy të tjera që kanë ardhur në Lojërat e fundit. Pesë medaljet olimpike, edhe medaljet evropiane, mesdhetare, dhe të tjerat», tha Haxhijaj. Ai shtoi me shqetësim për gjendjen aktuale: «Ajo çka nuk e besoj, ajo çka nuk dua ta besoj është që ky imazh i Kosovës, i sportit të Kosovës të prishet për bajraktarizëm. Pse jam unë, mos të jetë ai tjetri».

Ish-sekretari i KOK-ut kërkoi që zgjidhja të gjendet menjëhirë pa dëmtuar imazhin e ndërtuar ndër vite. «Krejt problemin e kemi dhe duhet me ia heq që thonë pleqtë, petën lakrorit, për dy figura, krejt ky rrezikim është duke ndodhur. Domethënë pse nuk munden ta durojnë njëri tjetrin. Mua fare nuk më intereson kjo pjesë. Unë jam një prej njerëzve që kam kontribuar në sport dhe raportet mes atyre dy njerëzve nuk më interesojnë. Mua më interesojnë ata t’i kalojnë ato edhe t’i organizojnë Lojërat Mesdhetare», deklaroi ai.