Gani Geci në spital për tension të lartë, Gjykata refuzon ankesën e mbrojtjes

Ish-deputeti Gani Geci është dërguar në Spitalin e Pejës për trajtim mjekësor pas shqetësimeve me tensionin e lartë të gjakut. Sipas burimeve të Klan Kosovës, Geci është paraqitur në spital gjatë ditës së djeshme dhe ende nuk është liruar. Drejtori i Spitalit të Pejës, Fahri Hasani, ka konfirmuar se Geci është dërguar në spital për ekzaminime mjekësore, ndërsa gjendja e tij është vlerësuar stabile.

Gjykata e Apelit ia ka refuzuar ankesën e mbrojtjes së Gecit kundër vendimit të Gjykatës Themelore për caktimin e paraburgimit prej 30 ditësh. Mbrojtja e Gecit kishte kërkuar anullimin e vendimit të Themelores dhe lirimin e tij. Gani Geci është në paraburgim nën dyshimin për kanosjen e gazetarit Lirim Mehmetaj.

Siç raportoi Zhurma më 14 tetor, Gjykata Themelore e Prishtinës i ka caktuar Gani Gecit paraburgim prej 30 ditësh për dyshimet rreth kanosjes së Mehmetajt. Prokuroria thekson se Geci ia kishte thënë Mehmetajt «Kena me u vra» me kusht që të hiqet ose ndryshohet një postim në Facebook.