Çeku: Strategjia e Arsimit 2035+ përfshin edukimin në fëmijërinë e hershme

Ministri i Arsimit dhe Shkencës, Hajrulla Çeku, mbajti takim me drejtorët e institucioneve parashkollore për diskutimin e Strategjisë së Arsimit 2035+. Sipas Ministrisë së Arsimit dhe Shkencës (MASH), Çeku theksoi se edukimi në fëmijërinë e hershme është një nga shtyllat kryesore të strategjisë së re. Ai vlerësoi përfshirjen e drejtpërdrejtë të edukatoreve në hartimin e strategjisë si të rëndësishme për përcaktimin e masave konkrete që adresojnë nevojat e sektorit.

Çeku theksoi se një nga synimet kryesore të strategjisë është që çdo fëmijë në Kosovë të përfshihet sa më herët në sistemin e edukimit dhe kujdesit, përmes përcaktimit të standardeve të përbashkëta për institucionet e edukimit në fëmijërinë e hershme dhe orientimit efikas të investimeve për qasje dhe cilësi të shërbimeve.

Drejtuesit e çerdheve paraqitën propozimet dhe rekomandimet e tyre gjatë takimit, duke sjellë perspektivën profesionale për nevojat dhe sfidat në fushën e edukimit dhe kujdesit në fëmijërinë e hershme, të cilat do të përdoren në hartimin e Strategjisë së Arsimit 2035+.