Operacioni ndërkombëtar në Spanjë godet rrjetin e trafikut të kokainës

Autoritetet spanjolle kanë sekuestruar rreth 2,100 kilogramë kokainë në një varkë me vela, e cila u lokalizua rreth 400 milje larg brigjeve të Galicisë. Operacioni i koduar «Maiden» u krye përmes anijes «Petrel I» të Shërbimit Spanjoll të Mbikëqyrjes Doganore, e cila ndërhyri gjatë kontrollit për të zbuluar 70 pako me lëndë narkotike. Në bordin e mjetit lundrues u arrestuan katër persona, konkretisht një shtetas argjentinas, një uruguaian, një kolumbian dhe një shqiptar. Sipas hetuesve, shtetasi shqiptar dyshohet se kishte rolin e ndërmjetësit, duke garantuar për organizatat kriminale të Evropës Lindore se transporti po zhvillohej sipas planit.

Hetimet kishin nisur që në muajin shkurt pas marrjes së informacioneve se një varkë mund të ishte përfshirë në transport droge në zonën kufitare mes Spanjës dhe Francës. Anija ishte identifikuar fillimisht në portin e Roses, në provincën e Gironas, për t'u larguar në korrik pa sistemin e identifikimit dhe gjurmimit AIS të aktivizuar. Pas humbjes së gjurmëve, autoritetet spanjolle bashkëpunuan me Agjencinë Kombëtare të Krimit të Mbretërisë së Bashkuar dhe DEA-n amerikane për të bërë të mundur lokalizimin e saj në ujërat e Atlantikut.