Fronti Europian tërheq amendamentet dhe braktis seancën parlamentare

Grupi parlamentar i Frontit Europian ka vendosur të tërheqë amendamentet e mbetura për rebalancin e Buxhetit të vitit 2026, duke braktisur njëkohësisht seancën në shenjë proteste. Deputeti Salih Murat bëri të ditur përmes një reagimi në rrjetet sociale se ky koalicion kishte paraqitur gjithsej 80 amendamente, të cilat sipas tij ishin konkrete dhe të orientuara drejt nevojave të qytetarëve.

Sipas Muratit, propozimet e tyre u refuzuan pa një debat të mirëfilltë, ndërsa procesi u cilësua si i paracaktuar. «Kur propozimi i opozitës refuzohet paraprakisht, nuk ka negociata, ka vetëm ritual. Ky rebalanc, sipas vlerësimit tonë, është partiak, selektiv dhe antidemokratik», ka shkruar ai, duke shtuar se përgjegjësia për këtë buxhet i takon atyre që votuan për të.