Protestë në Prishtinë: Shteti t'i trajtojë seriozisht jetët e grave

Në ditën e pestë të marshit kundër femicidit në Prishtinë, protestuesit u nisën nga sheshi “Zahir Pajaziti” drejt ndërtesës së Qeverisë së Kosovës, ku hodhën tym të kuq në shenjë revolte ndaj vrasjes së grave. Të pranishmit kërkuan drejtësi për Arlinda Zekajn dhe dorëheqjen e ministrave Sveçla e Gërvalla, pas rastit tragjik të ndodhur në Vitomiricë të Pejës.

Aktivistja Luljeta Demolli theksoi se shoqëria nuk mund të presë më pasojat e fjalëve të kota dhe dembelizmit institucional. «Varrezat e grave janë të mbushura me premtime që janë ofruar përgjatë viteve me fjalë të kota, me konferenca, me papërgjegjësi kriminale e dembelizëm institucional dhe me simbolika», tha ajo, duke kërkuar garanci se shteti do t'i trajtojë seriozisht jetët e grave. Gjatë protestës u lexua edhe letra që Arlinda Zekaj ia kishte dërguar kryeprokurores para tragjedisë.

Arlinda Zekaj u vra në Vitomiricë të Pejës më 25 tetor nga kunati i saj. Ngjarja ka sjellë masa ndëshkimore dhe largime nga detyra, ku janë suspenduar 11 zyrtarë policorë, si dhe kryeprokurorja e prokurorja e Pejës, ndërsa drejtori i Policisë së Kosovës, Gazmend Hoxha, ka dhënë dorëheqje. Gjatë gjithë zhvillimit të marshit, prania e forcave të rendit ka qenë e dukshme për ruajtjen e sigurisë.