Boçi: Qeveria teknike, kusht për zgjedhje të lira

Deputeti i Partisë Demokratike, Luçiano Boçi, ka akuzuar kryeministrin Edi Rama se po përdor çdo mekanizëm për të mbajtur pushtetin, duke përfshirë blerjen e votave, bashkëpunimin me krimin dhe penalitetet ligjore për të ushtruar presion ndaj protestuesve. I ftuar në një intervistë me gazetaren Sibora Bitri, ai nënvizoi se sjellja e kryeministrit i ngjan asaj të diktatorëve dhe autokratëve që ndërhyjnë në ligje për të kufizuar forcën e revoltës qytetare.

Boçi theksoi se protestat duhet të vijojnë deri në largimin e Ramës dhe krijimin e një qeverie teknike ose kujdestare, e cila të garantojë zgjedhje të lira dhe të ndershme pa ndikime apo duar të zgjatura te vota. Sipas tij, opozita duhet të mbetet aktive dhe e përgatitur për zgjedhjet e ardhshme lokale, duke siguruar një proces elektoral pa manipulime, presione dhe përdorim të administratës në funksion të pushtetit.