Gjigantomakia

Gjigantomakia (greq. «beteja e gjigantëve»), lufta mitike midis perëndive olimpiane dhe gjigantëve. Sipas mitologjisë greke, gjigantët, bijtë e Gjeas (Tokës), u ngritën kundër perëndive të Olimpit për t'u hakmarrë për dënimin e titanëve. Beteja u zhvillua në Flegra (Trakë). Gjigantët sulmonin Olimpin duke hedhur shkëmbinj e trungje drurësh të ndezura. Zeusi i godiste me rrufenë e tij, Atena luftonte me mençuri dhe forcë, Poseidoni godiste me tredentin, Apoloni me shigjeta dhe Hefesti hidhte hekur të shkrirë. Megjithatë, sipas një orakulli, perënditë nuk mund t'i mundnin gjigantët pa ndihmën e një të vdekshmi. Prandaj Zeusi thirri në ndihmë Herakliun, i cili me harkun e tij vrau shumë gjigantë, duke vendosur fatin e betejës në favor të perëndive. Atena hodhi ishullin e Sicilisë mbi gjigantit Enkeladin, kurse Poseidoni shkëputi një copë nga ishulli i Kosit dhe e hodhi mbi Polibotin. Gjigantët e mundur u varrosën nën vullkane dhe ishuj, ku vazhdonin të tronditnin tokën. Gjigantomakia ka qenë një temë e pëlqyer në artin greke, veçanërisht në skulpturën e altarit të madh të Pergamit (shekulli II para es.), një nga kryeveprat e artit helenistik. Ky mit simbolizonte fitoren e rendit dhe të qytetërimit mbi forcat e egra të natyrës (→ Gjigantët).

Gjuetia e Kalidonit → Meleagri