Edward Joseph: Kosova ta shfrytëzojë Specialen për Këshillin e Evropës

Profesori amerikan Edward Joseph ka deklaruar se Kosova duhet të shfrytëzojë mundësinë për të negociuar me Bashkimin Evropian rreth shqetësimeve për Gjykatën Speciale, duke e lidhur këtë çështje me anëtarësimin në Këshillin e Evropës. Kjo qasje sipas tij ofron një mundësi të jashtëzakonshme për vendin përmes një rruge të re institucionale.

Në një bashkëbisedim me publicistin Veton Surroi në podcastin “PIKË”, profesori amerikan Edward Joseph ka theksuar se ekziston një përputhje e rëndësishme interesash mes Kosovës, Bashkimit Evropian dhe administratës amerikane. Sipas tij, arritja e një marrëveshjeje dhe mirëkuptimi të përbashkët mund t'i hapë përfundimisht rrugën anëtarësimit të Kosovës në Këshillin e Evropës.

Anëtarësimi në këtë organizatë evropiane do t'i mundësonte Kosovës qasje drejt Gjykatës Evropiane për të Drejtat e Njeriut, ku çështjet dhe vendimet e lidhura me rastet e Gjykatës Speciale do të mund të shqyrtoheshin në përputhje me juridiksionin përkatës. Sipas profesorit Joseph, kjo nuk nënkupton aspak shpërfilljen e detyrimeve ndërkombëtare të vendit, por kërkimin e zgjidhjeve përmes një dialogu të hapur me partnerët ndërkombëtarë.

Gjatë bisedës së tyre, Joseph ka ngritur gjithashtu çështjen e dënimeve të shqiptuara nga Gjykata Speciale, duke i cilësuar ato si potencialisht disproporcionale, ndonëse ka saktësuar se nuk mund të japë një vlerësim përfundimtar pa shqyrtuar më parë mijëra faqe provash. Ai ka kërkuar që të diskutohen hapur edhe kohëzgjatja e proceseve gjyqësore, shpenzimet dhe buxheti i gjykatës, si dhe krahasimi i dënimeve me ato të Tribunalit të Hagës, duke shtuar se asnjë institucion i drejtësisë nuk qëndron mbi kritikën.

«Ka përputhje me administratën që Kosova mund ta zbatojë dhe gjithashtu me Bashkimin Evropian në një mënyrë shumë të rëndësishme për të arritur një mirëkuptim, një marrëveshje që mund të përfshijë më në fund anëtarësimin e Kosovës në Këshillin e Evropës», ka deklaruar Edward Joseph gjatë podcastit.